樓市沉靜一時后爆旺，各區二手成交量都忽然大增，筍盤幾乎已被吸納得一干二凈，有部份業主即使急于套現，但眼見樓市回勇，又不甘心平價出貨，唯有銀彈攻勢，誓要成為代理界的筍盤。

所謂的銀彈攻勢，不外乎加傭加獎金，筆者近排有個朋友放售一層半新盤，對上一個同類型成交做600頭左右，朋友放盤時代理講渠知，市面同類單位一盤放700多少少，加上朋友眼見近日樓市反彈，就算自己急套現，都一于照跟市價放700多萬。

但他亦心知，如果放盤價與其他單位相若，有何吸引力要代理力推他的單位呢，加上他其實都頗為心急賣樓，于是乎便與代理提出條件，一個月內成交賣出單位，給樓價1.5%傭金，較正常的1%多5成，如果以700萬成交，即是多3萬5，計埋拆帳，個代理都多收1萬多元，對主力做中下價樓的代理而言相當吸引。

所謂有錢使得鬼推磨，重賞之下必有勇夫，結果原本出租的單位交吉當刻，頭兩小時已經有3臺客睇樓，不足一個星期，幾乎日日都有十多個電話話客人有興趣要睇樓，雖然話近排市旺，但無可否認這個盤的反應的確不俗，雖然單位至今暫未售出，不過代理反應如此熱烈，相信都頗大機會可以一個月內賣出。

其實有時業主想賣個好價或快點出貨而加傭加獎金，情況與新盤做法有點相類同，一些筍價盤或先天已是焦點的大盤，傭金自然會較少，好似早幾個月推售的凱匯，價錢吸引，而且又是東九龍核心地段，代理要賣根本不費吹灰之力，所以發展商才開出1.7%傭金的條件，雖然事后都受到業界炮轟而有所提升，但一些地區差但樓價又貴的新盤，閑閑地要有5至6%傭才吸引到代理效力。

除了直接加傭金，有時業主想以高價售出，便會以獎金形式，與代理對分多出的金額，例如一個單位底價700萬，如700萬元成交，業主付1%傭，即7萬元，但例如單位成功以720萬賣出，多出的20萬業主跟代理對分，即各人多收10萬，這個條件，便推使很多代理落力替業主爭取更好的價錢，畢竟，一個盤好與壞，值多少錢，又有幾多買家了解得一清二楚，如果差距不是太跨張，代理所說的話自然有其價值。